ielts-registration-39516

تجربة حصولي على 8.5 في الايلتس بالقراءة + نصائح ومصادر ذهبية

“كيف عبدالرحمن جبت 8.5 في القراءة؟! ايش سويت؟ ايش تنصحني؟”

“طيب انا باقي لي على الاختبار اسبوع.. هل اقدر اجيب 6.5؟”

” راح اموت من القهر.. اختبرت 4 مرات والدرجة معلقة على 4 .. بليز ايش اسوي؟”

بالضبط راح اجاوب على هذه الاسئلة خلال هذه المقآآلة..

حابدأ معاك الاول بقصتي مع الايلتس اللي بدت من اول ثانوي و كان مستواي مرة ضعيف و ولا مرة دخلت معهد بحياتي ولا كنت اعرف باللغة الانكليزية جيدا ..و لكن الحمدلله طلعت من الثالث ثانوي و درجتي في الايلتس 7.5 بشكل عام و 8.5 بقسم القراءة
يعني اللي انا اركز عليه و انو انت تقدر تجيب الدرجة اللي تبغاها بالايلتس ..سواء كانت 7.5 ولا 8.5 ..بس عليك انك تجتهد و تحمس نفسك
في امرين لازم تركز عليهم
_ انك تعرف الطريقة الصح
_ و انك توفر وقت
فاذا عرفت الطريقة الصح و عطيت الوقت اللي مفروض تعطي ان شاء الله تجيب الدرجة اللي تبغاها

* و في نقاط اساسية راح نتكلم عنها :

_ النقطة الاولى : الايلتس و اللغة منفصلين

يعني اذا كانت لغتك ضعيفة لا يعني انك حتجيب درجة ضعيفة  و اذا كانت لغتك قوية لا يعني انك حتجيب درجة ممتازة
و مثال على ذلك انو اكثر المتحدثين الاصليين باللغة الانكليزية يختبرون الايلتس و تكون درجتهم 7 من 9 ..و ببعض الاحيان يختبر الاختبار اشخاص متعلمين اللغة حديثا و تكون درجتهم ممتازة
هذا يعني انو التركيز بالاختبار لا يكون على اللغة ..لكن التركيز يكون على الايلتس نفسه ! ..لان الايلتس هو اللي حيعطيك الدرجة

_ النقطة الثانية : من الضروري ان تقوم بدراسة ذاتية للايلتس

لو كنت اشتركت بعدة دورات مسبقا.. او اختبرت اكثر من مرة ..من الضروري ان تقوم بدراسة ذاتية للايلتس
الدورات او الاختبارات السابقة تساعدك بتوضيح الطريقة في الاختبار
يعني الدورات حتعطيك 30 % و انت لازم اللي تعطي 70 % !

ايواا ..انت دورك هو المهم

_ النقطة الثالثة : استبدل كلمة ايلتس بكلمة (تدرب)

الايلتس = تدرب
لان التدرب هو من سيعطيك الدرجة في الاختبار
و لكن نحن نفعل العكس دائما ..نركز على الاسرار و التكتيكات للاختبار و ننسى ان نتدرب !!
الاستراتيجيات و التكنيكات هي فقط تأهلك للتدرب ..يعني الوقت اللي نصرفه عليها هو فقط 10 % و باقي ال 90 % وقتك للتدرب

و نأتي الان لقسم القراءة اللي راح نتكلم عنو بالتفصيل

اللي صار معاي اول ما فكرت بالايلتس اني اخذت اختبار تجريبي لأعرف مستواي و كنت مبتدأ طبعا.. وقتها جاوبت على 5 اسئلة بس من اصل 40 سؤال
و لما اختبرت الايلتس بعدها وقت اللي جبت درجة 8.5 بالقراءة جاوبت على 38 سؤال صح من اصل 40 …شوف الفرق !!
يعني انا اعطيك العزيمة بس انك تقدر تجيب الدرجة اللي تبغاها بالايلتس.. لانو عارف انو الموضوع يحتاج حماس شوية ..

و بالعودة الى قسم القراءة و القطع الطويلة اللي ما تنتهي و المفردات الصعبة..

_ قسم القراءة بالاختبار مستحيل انك تفهم الكلام كله:

 ..و قراءة كل الكلمات واللي يحاول انو يفهمها كلها حيلاقي راح منو الوقت و تلخبط

يعني مثلا من الممكن ان تكون تبحث عن جواب و تجد ان الكلمات صعبة جدا او لم تفهمها ..فلا تحاول قراءتها مرة ثانية .. حاول المرور على الكلمات بسرعة ..و انتقل للسؤال اللي بعده

مثال اخر.. ممكن انك تقرأ مقطع كامل معين مرتين او ثلاثة و انت تحاول فهمه لتستخرج جواب.. و في النهاية لا تجد الجواب ..او يكون جوابك ناقصا ..و تلاقي انو وقتك راح
و نفي الموضوع للسؤال نفسو اذا قراته من الاول و لقيت انو صعب ولا حيضيع كل وقتك تجاهله و لما يزيد معاك بعض الوقت ترجع تشوفو

طبعا هذا الكلام لا يعني انو نتجاهل كل الاسئلة و كل الفقرات او نقول انها كلها صعبة لكن نترك الاسئلة اللي منكون متأكدين انها حتضيع كثير من وقتنا و نرجعلها بعدين لما يكون معانا وقت

_ خلصنا من الأسئلة و الحين نبدأ ب :

_ الفهم العام للمقاطع

انا اذكر لما اختبرت اخر مرة و جبت 8.5 كان في قطعة ما فهمت الفكرة العامة لها.. هذا الشي عادي ..دائما ستواجه اشياء مجهولة بالاختبار و خصوصا بقسم القراءة
الحين تعودنا انو دايما في شي مجهول بقسم القراءة .. نبدأ الان ب :

_ تقسيم الوقت في الاختبار

هذا الشيء الاساسي و المهم للنجاح بالاختبار
و التقسيم لا يكون ثابت و لكن يعتمد على هدفك من الاختبار .يعني الدرجة اللي تريدها..
هدفك الحول على 3.5 او 4 او 4.5 او 5 بالاختبار.. فيجب ان تعطي القطعة الاولى بقسم القراءة نصف الوقت المخصص يعني 30 دقيقة كاملة.. و القطعة الثانية تعطي لها 25 دقيقة ..و القطعة الثالثة تعطي لها 5 دقائق فقط !!
ممكن تتفاجأ او تسمع الكلام اول مرة ..لكن بتجربة الكثيرين هذه الطريقة ناجحة و تحقق فيها هدفك ..هذه النصيحة هامة جدا للي يبغا درة 5 او اقل يعني التركيز بكون على القطعة الاولى و الثانية و الثالثة 5 دقائق فقط

هدفك درجة اعلى من 5 قسم الوقت بالطريقة الاعتيادية .. 20 دقيقة لكل قطعة

نتكلم الان عن :

_ خطوات الحل بقسم القراءة ..كيف احل؟ 

حلخصلك خطوات الحل بكلمة بسيطة تساعدك كثيرا وقت الاختبار
الكلمة هي   ( حاد )

الحاء  حدد العنوان
الالف  اقرا السؤال
الدال   دور بالمكان الصح

الخطوة الاولى : حدد العنوان

فائدة تحديد العناوين هي انك تفهم الفقرة و تلخصها عشان لما تحتاج تشوفها من جديد تكون تعرف عن ماذا تتكلم الفقرة ..طبعا العنوان غير محدد يختلف حسب الشخص اللي يقرا القطعة…

كيف نحدد العنوان.. طبعا اتفقنا انو صعب جدا تقرا الفقرات كلها من البداية للنهاية ..تحديد العنوان يأتي من قراءة اول جملة كاملة بالفقرة ..و اذا صعب عليك تفسير اول جملة من الفقرة تقدر تقرأ اخر جملة كاملة من الفقرة ..كمان راح تساعدك تحدد العنوان..
ممكن تجد صعوبة بتطبيق هذا الكلام ..لكن اعطي نفسك فرصة انك تجرب الكلام هذا في اختبارين او ثلاثة اختبارات تجريبية و راح تكتشف انو حيفيدك..

 الخطوة الثانية : اقرا السؤال صح  

في هذه الخطوة عليك ان تفهم السؤال ..يعني تفهم جملة السؤال كلها ..يعني ما نقرا السؤال قراءة سطحية و نبحث عن الكلام اللي يشبه السؤال و نعمل نسخ و لصق بالإجابة على طول ..
*الخطوة هذي سريعة يعني مطلوب منك تفهم السؤال صح بسرعة ..

الخطوة الثالثة : دور بالمكان الصح

لما نريد نجاوب ما يحتاج منا نقرا الفقرة كلها من اول و جديد ..لازم نروح فورا على القسم من الفقرة اللي نكون عارفين انو الجواب موجود فيه.. فالمفروض قراءة القسم المحدد اللي تكون متاكد انك راح تلاقي الجواب فيه و ما تعيد قراءة الفقرة في كل سؤال و كدا بتكون استفدت و  استغليت وقتك بأكبر طريقة

بعد الانتهاء من خطوات الحل بقسم القراءة ..نروح على..

_ الارقام و الاعلام :

و هي الاسئلة اللي بتكون عن ارقام مثل التواريخ او الايام ..او عن الاعلام اللي هما الاشخاص المذكورين بالفقرة و اكيد يكون اول حون من اسمهم حرف كبير يعني capital  …و هذه الاسئلة ملاحظة اجوبتها سريعة فقط محتاجة منك شوية تركيز لان الربط بين الارقام او اسماء الاعلام هو امر سهل نسبيا عن باقي الاسئلة.. يعني الاسئلة هذه تقدر تسميها اسئلة الهدية بقسم القراءة ..اذا كان ما معاك وقت كافي ركز على هذه الاسئلة لأنها تساعدك

تبقى ان اعطيك الحين :

النصائح الذهبية للـ IELTS

 

النصائح الذهبية الاخيرة ..و هي نصائح عامة  لقسم القراءة و كل اقسام الاختبار..

*النصيحة الاولى :

الكتب … الكل يسأل عن الكتب و ايش هي افضل الكتب لاختبار الايلتس.. نصيحتي هي انك لا تشتري الا الكتب اللي تحتوي على اختبارات تجريبية.. لأنها اكثر شي يفيدك بالكتاب.. كل الكتب تحتوي على اسرار الاختبار و التكنيكات و تكون مختلفة و ببعض الاحيان تخليك متلخبط شوية.. يعني خلي الكتاب اللي تشتريه يكون فيه اختبارات تجريبية طبعا مع الاستفادة من نصائحه و التكتيكات اللي فيه
افضل سلسلة كتب موجودة للاختبارات التجريبية (IELTS  ) موجودة بالمكتبات لكنها مكلفة شوية.. الحل اللي انا طبقتو و الكثير طبقو  انك تروح على المواقع اللي فيها اختبارات تجريبية مجانية و تقدملك الفائدة اللي تريدها

واحد من افضل المواقع اللي تقدم الاختبارات التجريبية المجانية :

Ielts-exam.net\practice_tests

و انصحك انك تطبع هذه الاختبارات و تاخدها و بعدها تقارن اجوبتك بالحلول اللي بالموقع عشان تشوف درجتك و تعرف اخطائك..

* النصيحة الثانية :

اذا كنت تريد اسرار و تكتيكات للاختبار بالعربي و بدون لخبطة و من شخص متدرب بأكثر من 2000 ساعة على الايلتس و متخصص فيه.. انصحك تروح على حسابي بالتويتر ..راح تلاقي اللي تسال عنو و ان شاء الله اقدر اساعدك على قدر ما اقدر

الحساب :  DalilkMe@

*النصيحة الثالثة :

روح الاختبار و انت مركز .. حتحس انها سهلة و ما تحتاج اتكلم عنها ..لكن ممكن تكون هذي اصعب نصيحة ..لانو ممكن يكون اختبارك  بكرا و انت قاعد تذاكر طول النهار و الليل و تقول ما عندي الا هذا اليوم ..و هذا ببساطة حيضيعك .. لأنك حتروح ثاني يوم و يكون عندك استماع اول شي و انت مو مركز و بعدها محادثة و محتاجة تركيز و بعدها باقي الاقسام..
يعني اللي بقولو هو انو درجتك بالاختبار تعتمد على هذا اليوم مو على الايام ولا السنين الماضية اللي قاعد تذاكر فيها  و اذا ما كنت مرتاح و مركز راح الاختبار منك..
ما ابغى اني احزنك ..لكن لازم تعرف انو الكثيرين ذاكرو لمدة اشهر و  راحو الاختبار و هما مواصلين مذاكرة بدون نوم او راحة و لخبطو و  ضيعو الاختبار.. !!
يعني باختصار اخر يوم قبل الاختبار تاخد اختبار تجريبي واحد بس ..و تنام 8 ساعات على الاقل

الحمدلله كدا نكون خلصنا من اهم النصايح و الخطوات اللي تساعد على حل مشكلة القراءة بالايلتس.. واتمنى اني اساعدك و لو بجزء بسيط انك تحصل الدرجة اللي تبغاها بالاختبار.

About عبدالرحمن حجازي

عبدالرحمن حجازي طالب ثانوي مؤلف كتاب دليلك للايلتس و مساعد لكثير من الشباب خلال اليوتيوب وتويتر. هدفي هو ان اكون ادرس في افضل الجامعات وان اساعد الاخرين للوصول الى ذلك تعرف على اكثر خلال: www.dalilk.me

One thought on “تجربة حصولي على 8.5 في الايلتس بالقراءة + نصائح ومصادر ذهبية

Leave a Reply

Your email address will not be published.